لاصار حبك ذنب من يقدر يتوب

6/2/2010, 8:12 pm

تعال اسولف لك ترا الوقت محسوب
وهذا العمر بيروح من عرض ماراح

إي والله إني غبت مجبر ومغصوب
لابيدي ارجع لك ولا قادر ارتاح

الغربه القشره مشاوير ودروب
والليل عقبك خيل وفرسان ورماح

بعض البشر ارواح مافيهم قلوب
الله يجيرك صاروا بعيني اشباح

افز من نومي واناديك مرعوب
مثل الطفل لافز من نومه وصاح

في صوب هالعالم وحبي لك بصوب
البارح بطاريك لين الفجر لاح

لاصار حبك ذنب من يقدر يتوب
من رحت عن وجهك وانا كلي جراح

أرواحنا في البعد ساحب ومسحوب
والبعد مثل الموت لاجر الارواح

ماقلت لك ابن آدم اخطاء وعيوب
والمشكله محدن يشيله اليا طاح

ماعاد لي فالعمر رغبه ومطلوب
غديت كني بيد الايام مسباح

كل شي بهالدنيا مقدر ومكتوب
حتى الجفا .. حتى الحزن .. حتى الأفراح

ليته غيابي عنك ماهو بمحسوب
و ليتك اليا رحت من عرض ماراح

6/11/2010, 12:43 am

صح لسااااانك

تسلم تسلم

6/11/2010, 12:50 am

ياالله والله حلوه الابيات

كل شي بهالدنيا مقدر ومكتوب
حتى الجفا .. حتى الحزن .. حتى الأفراح

تسلم

6/11/2010, 1:14 am

صح بدنك اخت احساس واخت هذي انا يعطيكم العافيه مشكورين ع مروركم