برنامج مميز جداً وما تستغني عنه يعطيك مواعيد الصلاة وكم باقي عليها وتقدر ترسل مواعيد الصلاة لمدة شهر عن طريق الايميل وتقدر تخليه يعطيك تنبيه عند دخول مواعيد جميع الصلاوات او اي صلاة تختارها
هالبرنامج متخصص بالمسلسلات الامريكية ... ميزته انك اذا كنت تشوف مسلسل امريكي وما تدري وش اسمه او كم رقم الحلقة ... شغل البرنامج واضغط على الزر الأخضر وبعدها البرنامج يبي يسمع المسلسل ويتعرف عليه
هذا برنامج توني شاريه قبل اسبوعين ... ميزته اذا جيت تنام خل الجوال جنبك .. والبرنامج يبي يقوم بتسجيل اي صوت بالغرفة ... يعني كانك تتكلم وانت نايم تبي تعرف وكانك تشخر تبي تسمع نفسك اذا صحيت ... حتى لو جاك ازعاج بالغرفة برضة يبي يسجله ميزته ما يسجل الا اذا كان فيه صوت فقط لكن نصيحه اللي عنده مكيف صوته قوي بالغرفة تراه ما ينفع لأنه يبي يسجل طول فتره النوم
هذا برنامج غريب عجيب ومجاني صور نفسك وبعدها اضغط مثلاً على علامة العيون اللي تحت على اليسار وصور شخص ثاني بعدها يبي يطلع لك البرنامج صورة غريبه تجمع وجهك على عيون ثانيه بصراحة مسلي جداً وانصح فيه
فكرة هالبرنامج جداً حلوة ... اذا كنت ناوي تغيير الوان غرفتك فهالبرنامج يبي يفيدك وهو مجاني صور الغرفة واختر اي لون تبي واضغط على الجدران ويبي يتغير الوانها مباشرة للون اللي اخترته حلو انك تشوف اللون الجديد قبل ما تصبغ الغرفة
برامج الماسنجرات ما فيه اكثر منها لكن برأيي هذا افضلها وأكثرها انتشار وفيه منه نسخ للأندرويد والبلاك بيري والنوكيا والسوني اريكسون واغلب انواع الجوالات يعني شامل وفيه مميزت كثيرة منها ارسال الصور او الفديو او البرودكاست او المجموعات اشوف انه الأفضل بعد تجربتي لأكثر من برنامج
البرنامج المعروف سكايب (وليس سكايبي ) اعتبره أفضل برنامج محادثة مرئية وطبعاً تقدر تكلم فيه صوت فقط او حتى كتابة وتقدر عن طريقة تشتري رقم تلفون من أكثر من 30 دولة ويشتغل على الواي فاي والـ3G
هالبرنامج من أفضل برامج المحادثة الصوتيه ويمكنك عن طريقة ارسال رسائل SMS البرنامج معروف عند اغلبكم لكن قلت احطه لأنه يتميز عن غيره من البرامج بالصوت الصافي
برنامج معروف ومجاني وبصراحة ما استغني عنه في سفراتي واغلب حجوزاتي عن طريقة يعطيك اسعار رخيصه للفنادق في معظم دول العالم تقدر تغيير لغة البرنامج للعربية وتقدر تغير العملة للريال مره كنت في احد الدول وجاي ابمدد بالفندق وقلت له بكم الليله قال بحوالي 800 ريال دخلت على البرنامج وانا واقف عن الريسبشن وحجزت نفس الغرفة بـ550 ريال
اذا كنت من متابعي الكورة السعودية فهذا أفضل برنامج حالياً يعطيك مواعيد المباريات القادمه ويعطيك تنبيه قبل المباراة بخمس دقائق (طبعاً لازم تختار التنبيه للمباريات اللي تبي) يعطيك النتائج وآخر الأخبار الرياضية
استخدم هالبرنامج من حوالي 4 شهور ... قبل ما تنام تشغل البرنامج وتخلي الجوال جنبك بعد ما تصحى يقول لك متى كان نومك عميق ومتى كان خفيف لكن أفضل ميزة فيه هي عملية التنبية مثلاً تبي تصحى الساعة 7 الصباح تحط بالبرنامج انك تبي تصحى ما بين 6:30 و 7:00 والبرنامج يختار افضل وقت علشان يرن ويصحيك ... وغالباً يختار الوقت اللي يكون فيه نومك خفيف ... وبالتالي تقوم بدون اي ازعاج
برنامج رائع بمعنى الكلمة ومجاني تقدر عن طريقة الدخول على جهاز كمبيوترك الشخصي والتحكم فيه بالكامل فوائدة كثيرة فمثلاً ودك تلعب العاب فلاش على الايفون ؟ ما فيه داعي للجلبريك ادخل عن طريق هذا البرنامج على كمبيوترك وافتح المتصفح والعب براحتك
اتوقع هالبرنامج ما يعرفونه الكثير هذا يعتبر شبكة اجتماعية لكن بالصور ... يعني بعد ما تسجل وتدخل البرنامج كل 5 ثواني تنزل صورة من اعضاء الشبكة الاجتماعية وتقدر تعلق عليها وانت برضة تقدر اي صورة
اذا كنت من هواة التصوير فأكيد تبي تحتاج مثل هابرنامج البرنامج غير مجاني لكن يستاهل من يشتريه ويعطيك 187 تأثير تقدر تضيفها على الصور اللي تصورها ... مميز جداً
5/17/2011, 2:12 pm
